Pagina:Poesie e satire di Pietro Buratti veneziano.pdf/5

Da Wikisource.

3

De infiubarghe a le preste al Colarin
     Co gera l’ora de la Santa Messa,
     De no romperghe mai el Chitarin
     Co el diseva l’ufizio in pressa in pressa,
     Ma pò de starghe drio come un putin
     O come le pelae co la Badessa;
     Che de farse ubidir tre gran rason
     Xè l’esser Barba, Paroco, e Paron.
El zorno (come zà v’è dà in lontan
     Qualche indizio al principio deste otave)
     Gaveva el Barba un cuor de marzapan
     Da bisegarghe drento senza chiave,
     Ma co el vin ghe toleva un fià la man
     Lo vedevi, per Dio, butar le bave
     E da la bala ereditar a sguazzo
     Desinenze brutali in ona, e in azzo.
Le Pute spasemae da lù scampava
     No volendo col Barba coleganza
     E lù alora da bestia se infuriava
     Zigando, venì qnà senza creanza;
     Ma fra i strapazzi quel che dominava
     Per una certa mata stravaganza
     No gera elbu o elba, ma el dirghe forte
     A tute do le Nezze Pote storte.
Dai ancuo, dai doman, ste parolazze
     Gà comincià a far senso e senso tal
     Che quantunque bonissime regazze
     Le sà messo in sospeto de un gran mal,
     Tanto più ch el gà dito un dì Potazze
     Invaso da un furor proprio bestial,
     E Cate più de Beta, e non a caso
     A sto superlativo è storto el naso.